Sýningin Ferðalög og frístundir verður haldin í Íþrótta- og sýningarhöllinni í Laugardal dagana 8.-10. maí 2009. AP almannatengsl halda sýninguna í samvinnu við iðnaðarráðuneytið, Ferðamálasamtök Íslands, Golfsamband Íslands og aðra samstarfsaðila. Þar mun sameinast á einum stað allt sem viðkemur ferðalögum, frístundum og afþreyingu, innanlands og utan.

Fjölmörg sóknarfæri eru í ferðaþjónustu og frístundum og gefst hér einstakt tækifæri fyrir fagaðila jafnt sem almenning að kynna sér þá möguleika sem í boði eru. Sýningin Golf 2009 verður haldin samhliða Ferðalögum og frístundum – og kjarninn í ferðasýningunni verður Ferðatorgið, þar sem ferðamálasamtök landsins kynna hvert sinn landshluta og ferðaþjónustu á sínu svæði.

Markmið sýningarinnar er að kynna fjölbreytileika ferðaþjónustu og frístundamöguleika á Íslandi og vekja athygli á þeim öflugu fyrirtækjum og stofnunum sem koma að ferða- og afþreyingarmálum. Hvetja á Íslendinga til að skoða þá fjölbreyttu möguleika sem í boði eru og benda á nýjar og spennandi leiðir til að upplifa og kynnast landinu; auk þess sem framboð á ferðum til útlanda verður kynnt . Ennfremur verður kynning á fjölbreyttu framboði frístunda-, afþreyingar- og íþróttastarfs sem í boði er fyrir börn, unglinga og fullorðna.

Upplýsingar um sýningarrými, skráningu, skilmála, verð, tryggingar o.þ.h. er að finna á vefsvæði sýningarinnar.